5-августта Украинанын президенти Владимир Зеленский АКШнын лидери Дональд Трамп менен телефондон сүйлөштү. Эки лидер АКШнын атайын чабарманы Стив Уиткоффтун Москвага сапарын утурлай сүйлөшкөнү маалым болду.
"Бүгүн Украина жана Кошмо Штаттар өз позицияларын координациялады, - деп Зеленский социалдык тармакка жазды. - Орусиялыктар катуу сокку ура баштаган кырдаалга ар кимибиз өз баабызды бердик. Президент Трамп Киевге жана башка шаарларга жасалган орустардын чабуулдары тууралуу толук маалымдар".
Украин лидери сүйлөшүү жемиштүү өткөнүн белгилеп, Трамптын "калыс жана туруктуу тынчтыкка жетүү үчүн жасаган бардык аракетине" ыраазычылык билдирди.
Апта башында Трамп анын жардамчысы Стив Уиткофф алтынчы же жетинчи августта Москвага барарын айткан. Вашингтондун өкүлү Орусиянын жетекчилиги менен жолугушмакчы. 8-августта Трамптын Москвага Украина менен тезинен тынчтыкка жетишүү үчүн койгон ультиматуму аяктайт.
АКШнын президенти эгер Москва тилге көнбөсө Кошмш Штаттар Орусияга, анын соода өнөктөштөрүнө тарифтерди көтөрүп жана "башка чараларды" колдонорун билдирген. Кремл Вашингтондун "маалыматына көңүл бурганын" билдирген. 5-августта Reuters Путин согушту токтотпой турганын жазды.
Орусиянын Кыргызстандын жарандарын согушка тартуусу кооптуу болуп турганын 5-августта Украинанын Аскер туткундары боюнча маселелерди координациялоо штабынын "Хочу жить" мамлекеттик долбоору билдирди.
Долбоордун маалыматына караганда, Орусиянын Коргоо министрлиги менен келишим түзгөн кыргыз жарандарынын саны кеминде 327ге жетти.
"Чыныгы сан мындан да көп чыгар, анткени тизмеге Кыргызстандын жарандары гана кирди, орус жарандыгы бар кыргызстандыктар кирген жок", - деп жазды "Хочу жить".
Быйыл апрель айында жарыяланган тизмеде согушка 2023-2024-жылдары тартылган жалпы кыргызстандык 360 жалданма аскер тууралуу маалымат кирген.
Долбоор "Республиканын өзүндө орусиялык жалдоочулардын кыргызстандыктарды согушка жөнөтүп, канчалык көйгөй жаратып жатканын түшүнүп турушат. Мисалы, быйыл апрелде Ошто азгырып жалдоо менен алектенген төрт киши кармалган, алардын арасында бул шаардагы "Орус үйүнүн" кызматкери да болгон. Аларды тергөө абагынан үй камагына чыгарышканы менен кылмыш ишин тергөө уланууда" деп жазды.
Кыргызстан мындай көйгөйдүн алдында алсыз экенин, себеби 450 миңдей жараны Орусияда эмгек мигранты болуп жүргөнүн белгилеген "Хочу жить" рейддер учурунда кармалгандары орус полициясынын түрдүү кысымына кабыларын, депортация же түрмө менен коркутканда же орус жарандыгын жеңилдетилген шартта берүүнү убада кылганда айласыз макул болуп, кан майдандын алдыңкы катарына жөнөтүлөрүн кошумчалады.
"Колониалдык империя болгондуктан Орусия коңшуларынын адамдык ресурсун жалмап бүтмөйүнчө жаны тынбайт. Орустар каршылык көрмөйүнчө кыргыздарды акча берип, өлүмгө айдай берет. Бул өзүнөн өзү токтоп калбайт. Кыргызстандын жетекчилигинде өз жарандарын коргоого, Орусиянын аларды өз максатында пайдалануусуна жол бербөөгө даанышмандыгы жана саясий эрки жетет деп үмүттөнөбүз", - деп жазылды украин долбоорунун Телеграм каналында.
Буга чейин долбоор Орусия Украинага каршы согушуна айдаган казакстандыктардын жана өзбекстандыктардын тизмесин жарыялаган.
Орус аскерлеринин катарында Украинага каршы согушуп жүргөн борборазиялыктардын саны он миңдеп саналышы ыктымал экени айтылууда. Украина орус бийлиги аларды адатта жөө аскерлердин алдыңкы катарына коёрун белгилейт.
Орус аскерлеринин 5-августка караган түнкү соккусунан Украинанын Харьков облусунун Лозовая шаарында көп кабаттуу үйлөр, эң зарыл инфраструктура зыянга учураганын калаа башчысы Сергей Зеленский билдирди. Анын айтымында, жараат алгандардын арасында эки бала бар.
"Лозовая согуш башталгандан берки эң чоң чабуулду башынан өткөрдү. Куткаруучулар, дарыгерлер иштеп жатышат. Суу менен камсыздоо системасын калыбына келтирип жатабыз. Шаардын бир бөлүгү электр жарыгысыз отурат", - деди ал.
Өлкөнүн Куралдуу күчтөрү өткөн түнү бул шаарды көздөй Орусиядан согуштук дрондор учуп баратканын эскерткен.
Жалпысынан 5-августтун түнүндө Орусия Украинанын аймагын 46 "Шахед" жана башка дрондор, "Искандер-М" баллистикалык ракетасы менен бутага алганы, учкучсуз учактар Курск, Брянск, Орел жана Приморско-Ахтарск аймактарынан, ракета Брянскиден учурулганы маалымдалды.
Украинанын Өзгөчө кырдаалдар боюнча мамлекеттик кызматы тараткан сүрөттөрдөн Лозовая шаарынын темир жол инфраструктурасы, вагондор, вокзалынын имараты талкаланганын көрүүгө болот. Мекеменин маалыматына караганда, алты жерде өрт тутанды.
Соңку кабарлар боюнча, жалпысынан 10 киши жабыркады, бир кишинин өмүрү кыйылды.
Орусия адатта Украинага жасалган чабуулдары боюнча маалымат бербейт. Эки өлкө ортосундагы согуш 2022-жылдын февраль айында Москва коңшусуна толук масштабдуу кол салуусун баштагандан бери уланып келе жатат.
Краматорск: Орус армиясынын соккусунан алты киши набыт болду
Орус армиясы Донецк облусунун Краматорск шаарындагы көп батирлүү үйгө сокку урганда алты киши набыт болуп, 11 тургун жарадар экени кабарланды. Соңку маалыматка караганда дагы төрт киши урандынын алдында калган.
Бул тууралуу облустук аскердик администрация башчысы Вадим Филашкин билдирди.
Издөө-куткаруу иштери уланууда.